又嚟到新春檔期喇！從影評角度嚟講，有人會話賀歲片邊有高低質㗎啫？嗱，說話就唔係咁講喇！睇賀歲片嘅目的係求開心，如果睇完都冇開心感覺，好明顯就唔合格。為咗感受一下賀歲片嘅歡樂氣氛，於是就入戲院睇吓由李思捷執導嘅《一家大晒》。睇到個名，係符合賀年電影嘅格式，不外乎一家團圓、講親情嘅；再見到有林敏驄同李思捷，起碼都係搞笑底，仲有狄龍、羅家英、廖偉雄呢幾個大師級，應該都OK啩…所以就入場睇。
點知原來呢95分鐘係一場忍耐力嘅測試…
睇張海報幾有阮大勇嘅feel，感受到係賣80年代懷舊feel。（網上圖片）
點解咁講？因為呢95分鐘充滿好多幾尷尬嘅地方。本來覺得有公認搞笑、無厘頭嘅林敏驄坐陣。只可惜睇嘅時候，根本分唔清佢係演緊戲，定係做返自己。因為佢用返平時有鄉音個tone講嘢，咁係咪即係做返自己呢？但當你仲思疑緊嘅時候，佢突然又正常返…完全係失晒控。
另一方面，劇情去到中途就出現咗飾演李思捷嘅小學同學錢瑩。基本上林敏驄嘅所有對白係挑逗錢瑩，直頭係性暗示，令人睇得好尷尬。到底林敏驄係爆緊肚定根本無劇本？定還是劇情需要？但係咪真係有呢個必要，加插一幕哄騙女方同佢發生關係（佢哋聲稱係做體操）？又話「一家大晒」、老少咸宜嘅？
狄龍carry全場。
除此之外，《一家大晒》開宗明義係一套搞笑電影。不過95分鐘似乎由少有搞笑嘅狄龍大哥carry全場，全因為佢一路以嚟都係正氣凜然，有著英雄氣慨，而家要佢搞笑係有反差，覺得幾得意。加上電影幾個高潮位都係由狄龍大哥帶起，為咗呢套電影，仲要畀一個大西瓜掟中，都真係唔話得。只不過講起電影中嘅「haha point」，總括嚟講係玩食字多，老實講呢類型嘅gag大玩80年代嘅輕鬆小品feel，只可惜略嫌有啲old school，就算在場嘅叔叔嬸嬸都笑唔出， 同時不時傳出呵欠聲。
咁樣好咩？
再講下劇情呀。呢套劇製造咗幾個懸念但直到完全都冇解開過。例如海報上面，蘇玉華騎住嗰隻雀，剩係知道佢存在咗30年，但好哋哋又點會係嗰度呢？又係冇講到。「camp camp地」經理羅家英又係喎，懷疑佢係午夜屠夫，但都係得個諗字咋，到底佢係咪有殺人？我諗同《The Room》入面，Lisa個媽咪冇啦啦爆咗句：「I definitely have breast cancer。」然後沒有然後，係有異曲同工嘅效果㗎！
睇到咁尷尬，中途不斷掙扎到底走唔走好呢？但係睇戲呢家嘢係有沉沒成本㗎嘛！睇咗一半，就惟有睇埋落去…雖然現場有唔少叔叔嬸嬸都頂唔緊，中途走咗…都至少證明呢個忍耐力測試入面，我係一個贏家！
以上评论为作者个人评论，不代表本号观点！
